ICPS hian naupang rethei leh tanpui ngai zual bikte tan Sponsorship Programme a buatsaih a, Sponsorship Committee ten naupang dinhmun zirchiangin tanpui ngai bik naupang an thlang chuak thin. Sponsorship ti a bik takin naupang chhungte lam atanga naupang Home a awm ngai thei dinhmuna dingte venna tura sorkarin ruahmanna a siam a ni. Dan hian naupangte hi a humhalhin chhungkaw neihtir a, chhungte bula awm se a duh ber a. Chhungkaw khawsak harsa lutuk, dinhmun phet laklawh avanga naupangte chhawmdawl nan, entirnan, an school kalna tur leh ei leh in tur chaw tha an neih theihna tur atana sorkarin kawng a buatsaih sak a ni.
Naupangte hian Sponsorship an dawn hian vil zuina uluk taka neih leh thin a ni a. An pawisa dawn hi an mamawh phuhruk nan an hmang em tihte leh an chhungten thil tul lovah an hmang em tihte uluk taka enthlak a, vil zuina neih reng a ni bawk. An pawisa dawn hi an mahni account (Nu leh pa emaw enkawltu bik tena an hawnpuiah pawisa hi chhunluh a ni thin bawk a ni) A theih hram chuan naupangte hi an school kalna a an zirtirtute biakpawh reng thin a ni bawk a, an school kalna a an dinhmunte enfiah pah reng an ni bawk a ni.
Hetianga naupang tanpuina dawngte hi hmasawn ve thei tura beisei an ni thin a. He tanpuina an dawn hmang hian an dinhmunte an lo insiam tha ve thin a. A thenchu kum 1 tanpuina an dawn atangtein an dinhmunte a lo zia awm ve thin a, chutiang angah chuan an pawisa dawn te tih tawp sak an ni thin a ni. An tanpuina dawnte hi tih tawp sak theih dan hrang hrang a awm a, chu chu Sponsorship Committee-in uluk taka ngaihtuahin atul hunah a ti tawp mai thin bawk a ni.