Baptist Church Orphanage

BCO CHANCHIN TLANGPUI

ENGVANGA HNUCHHAM IN HI DIN NGE A NIH ?

  • Kan pi leh pu te khan raicheha nu thihsan nausen an ngaihdan leh an pawmdan zawng zawng te kan missionary ho in an han hmuh khan nasa takin tan an la ta a.
  • Pu Buanga leh Sap Upa te chhungkua hmangin nausen chhanchhuahna hna ropui tak Lalpa’n a lo tan ta a ni.
  • Pi Dari leh kan missionary hmasate chuan theih tawpin nausen chu an lo enkawl chho tan ta a.
  • Kum 1917 bawr vel khan BCO hi kan missionary hmeichhe ho chuan an lo tan ta a ni.
  • Kum 1921 ah Zosap Missionary pathumte chuan heng a mizo naupangte hi chawm atan an lo la a ni:-
  1. Lalziki Sailo- chawmtu – Pi. Zirtiri
  2. Sappari- chawmtu – Pi. Dawki
  3. Thangmawii-chawmtu – Pi.Thari

Hun a kal zel a, Missionary hmeichhiate, school leh damdawi lama thawkte chu an hna a lo tam tial tial a, a lo hahthlak telh telh a, hna chhunzawm zel pawh a lo harsa ta a. Pi Thangchhumi, Lunglei bul Lungdai khua chu kan missionary te bula nausen enkawl dan leh bual dan leh chaw pek dan thlenga zir chhuak nu fel tak a ni a. An chhungkuain nau hnuchhamte chu an enkawl zui ta a ni.

NAUHNUCHHAM IN DIN TAN DAN TLANGPUI:

Kum 1951 ah chuan Serkawn Hmeichhe Middle school atangin Lunglei Bazar vengah, Pi Thangchhumi te in ah chuan sawn a ni ta a ni. Nausen hi chawh rualin 7 vel enkawl reng ang an ni a, naute eitur te pawh an chhungkhat laina hnai leh thenrual tha ten an tanpui na pawh in a daih seng ta meuh lo a ni.

MOTHERLESS BABY ASSOCIATION A LO PIANG TA:-

  • Kohhran leh mipuite tanpuina tello chuan nau hnuchham enkawl hi a hautakin a buaithlak a, sum leh pai tam tak a ngai a ni tih Lunglei khaw mipuite pawhin an lo hre chho ve ta a.
  • Kum 1953 ah chuan anmahni enkawl tur chuan Association dinin a hmingah “Motherless Baby Association” tih hi Lunglei mi tlawmngai ho chuan an lo din ta a ni.
  • Sawrkar ah in registered in Regn. No.50 of Motherless Baby Association tih a lo ni ta a ni. Motherless baby Association hmalaknain Hnuchham In tur chu Chanmari, Lunglei ah sak a ni ta a ni.

BAPTIST CHURCH ORPHANAGE DIN A NI TA:

  • Motherless Baby Association chuan enkawl chhunzawm zel pawh chu harsa tiin Kohhran hian a pumpuiin enkawlna hna thawk se tiin hotute nen vawi tam tak an inbia a.
  • Ni 4.06.1966 hian Baptist Kohhran hnenah enkawl tura hlan fel a lo ni ta a. A hming atan Baptist Church Orphanage tih a lo ni ta a ni.
  • Mizoram Kohhran rorelna sang ber chuan BCO chu Christian Hospital Serkawn (CHS) enkawl turin thu an ti tlu ta a ni.
  • Chandmari-a building chu Hospital nen a inhlat em avangin hmun remchang dang zawn a ni a. BCO hmun thar tur chu 12.04.2004 ah Pathianin in thar nuam tak mai, Serkawn Hmeichhe Hostel bulah min pe leh ta a.
  • Kohhran chuan Social Concern Department a lo din hnuah chuan Hospital enkawlna hnuaia awm tawh lovin, Social Concern Department hnuai-ah awm ve tawh se tiin a rel a.
  • Dt.12.04.2013 hian Social Concern Department hnuaiah enkawl turin a dah leh ta a ni. Chuta manager hmasa ber chu Rev.Sangliankhuma Chinzah a ni.
  • Tunah hian Rev. K Laldosanga chu Superintendent/Manager ni lai mek a ni. Staff hi mi 10 kan awm mek bawk a ni.

NAUSEN ENKAWL TAWH ZAT LEH SUL LO SU TAWHTE:

  • Mizoram Baptist Kohhranin BCO a enkawl hma khan missionary hmeichhiate leh Pi Chhumi khan nausen 56 vel an lo enkawl tawh a.
  • BCO tana sul lo su tawh tute chu:-
  1. Pi Thangchhumi Lungdai (1903 bawr vel)
  2. Nl. Neihkimi Zotlang, Lunglei (8th January, 1972)
  3. Nl. H. Sawiveli Chhipphir (25th April 1975)

Tin, 16th October, 2016 atang khan Specialized Adoption Agency in min lo belh a. Hemi hming atan hian Baptist Child Resources Centre (BCRC) tih ani. BCRC din anih hnuah hian naupang 11 adoption atan pekchhuah niin, inter-country adoption ah naupang 5 kal tawhin, In-Country adoption ah naupang 6 an chhuak tawh a ni. Tunah hian fa la duh in register Perspective Adoptive Parents(PAP’s) hi nupa tuak 4 an awm bawk. BCRC ah hian tun dinhmunah Coordinator hi Esther Lalremsiami a ni a. BCRC staff bik hi mi 11 an ni.