District Level Inspection Committee:
Tunah hian naupang Home hi paruk (6) a awm mek a, dan kalh a chete dahna hmun hi pahnih (2) a awm mek bawk a ni. Naupangte hi sawrkarin a ngaipawimawh em em a, Home-a an awm ringawt hian a ngaih a tha chuang lova, vil zuina tur tul hrang hrangte a buatsaih a ni. Chung ang zawng zawng an ti dik em? Dan angin an kal em tihte enfiaha endikpui turin DCPU hi ruat a ni a, chak takin hma a la mek zel bawk a ni. Home hote endik tur hian District Level Inspection Committee (DLIC) a ruat a, State level ah State Level Inpection Committee a awm bawk a ni. Heng committee ah te hian mithiam tak tak, khawtlang tana inhmang emaw, naupang lama thiamna bik leh tui bik mite ruat an ni a, Chairman (sawkarin a ruat) kaihhruaina hnuaiah Naupang Home ah te kal kualin, Quarterly visit (thlathum dan) a endik an nei thin a ni. Heta an thil hmuhchhuah leh hmalakna tur tul te chu bawhzui thin niin chutiang chuan a tul dan ang zelin hna thawh a ni.
Hetianga inspection (Endikna) a neih hian Home te hi a fangkual satliah a ni lova, Home ho te khan danin a phut an Home chhunga an zawm tur leh an neih turte, an tihturte an ti em tihte chenin an enfiah vek thin a ni. Dan hian kan sawi tawh angin naupangte hi a humhalh em em a, Home a naupang awmte’n an dikna chanvo an hmu em tihte a enfiah leh vek zel a ni. Home ho te’n a tlangpuia an tih tur leh dan an zawm ve thenkhatte chu Home building hmunhma, naupang tan a him leh him lohte leh home a naupang awm thei tur zat te a bithliah vek a, chu chu zawm a ni em tih endika enfiah a ni thin a ni. Sanitation leh hygiene(Inthiarna kawnga thianghlimna) chungchangah pawh hian Home ho ten an tih tur leh an zawm tur an zawm tha hle thin a ni. Naupang mutbu, inthiarna te a faithain a thianghlim em em tur a ni. Tin, Daily routine siamsak thlap tur an nih angin thawktu te’n naupangte milin an hun hman dan tur a duang chhuak thin a ni. An ei leh in turte, eitur tha an ei theih nan, an diet pawh mumal taka siamsak hi danin a phut tlat a ni. Naupang heti zat Home a awm ta chu an hriselna te pawh a pan thei, chuvang chuan enkawlna tha an mamawh em em a, Visiting Doctor an nei em tihte enfiah leh vek a ni thin a. Tin, Naupang Home tinah hian Para-medical staff/Nurse nei tura tih anih angin Home tinte hian an nei vek bawk a ni. Naupangte hi Home-a awm mawl tawp tura tih an ni lo ang hian zirna an nei tur a ni a, zirna lam an tuilo anih pawhin vocational training, an mahni kut kea an din theihna tur atan hian nasa takin buatsaih an ni ve bawk a ni. Tin, an taksa hriselna ringawt kha thlurbing a ni chuang lova, an rilru ngaihtuahna ti hrisel thei tur zawnga zirtirna pek pawh thawktu tha tak tak ten an buatsaih sak reng bawk a ni. Naupang tan an intihhlimna tur a pawimawh em em bawk a, chutianga an taksa sawizawi a, an intihhlim na tur an phak tawka buatsaih sak an ni bawk a ni.