Tunlai Covid-19 hrileng karah District Child Protection Unit, Women and Child Development, Social Welfare Department, Lunglei chuan Naupang Covid-19 hrikai te enkawl leh ngaihsak kawngah nikum March, 2020 atang khan hma la tanin, heng naupianghlim atanga kum 18 tling lo te tan hian theih tawpin a pen mek zel a. Heng naupang hri kai zingah hian Lunglei District leh Hnahthial District chhungah vanneihthlak takin nu leh pa emaw, nu emaw, pa emaw in a Covid-19 hri avanga thihsan an la awm lo a, chutihrual chuan he vanduaina hi kan Lunglei District leh Hnahthial District chhunga naupangte chungah a thleng anih erawh chuan District Child Protection Unit chuan sawrkar thuchhuah ang zelin theihtawpa hma la zel turin a in peih reng a ni.
Covid-19 hri avanga tuartu naute/naupang dan lo anga lak hi The Juvenile Justice Act, 2015, Section 80 dan kalh tlat a ni a, hetiang tih tum emaw ti an awm anih chuan dan anga hrem theih an ni.
Covid-19 hri avanga naupang nu leh pa emaw, nu emaw, pa emaw in an boralsan tanpui ngai kan hria anih chuan Central sawrkar/ State sawrkar atanga puihna awm thei ang angte an hmuh ngei theih nan a hnuai amite hnenah a rang thei ang bera hriattir turin mipuite kan in ngen e.
• District Child Protection Unit, Lunglei : 0372-2324437/9856157380
• Child Welfare Committee, Lunglei : 8119911379
• Childline, Lunglei : 1098/6009583003
• Special Juvenile Police Unit, Lunglei District: 0372-2324390/9485414441