Child Welfare Committee, Lunglei chuan nikum (April, 2020 – March, 2021) chhung khan Case 99 dawngin, heng zinga 80 te chu Naupang a bik a enkawl leh venhim ngai a puan an ni. Juvenile Justice Board, Lunglei pawhin nikum chhung vek khan case 18 an dawng bawk. Nikum lockdown chhung khan naupang chungah hian harsatna chi hrang hrang a thleng nasa hle a, heng case neih te zingah hian CWC bikah chuan nu leh pa ruihhlo in a tih buai avanga naupang chunga harsatna thleng a tam fal bik hle a, a bik takin nausen pawm lai te phei chu nu hnute hne lai an nih avangin an taksa ah harsatna a thlenin, a chang chuan an nute damdawi khawih chu an lo rui ve thin a, an suffer ve hial thin. Hemi bakah hian hursualna lam rawngkaia chetna hi nikum lockdown chhung khan a hluar em em bawk a, hetah hian puitlingin naupangte an va khawih mai piah lamah, naupang vekin a naupan pui a lo khawih mai te pawh a thleng.
CWC hian uluk tak a heng naupang 80 te chungchang a ngaihtuah hnu ah naupang 33 te chu Children’s Home a enkawl tur a dah an ni a, 35 te chu Counselling kal tur a tirh niin, retheih luat vanga harsatna tawk 5 te chu Sponsorship Committee ah ngaihtuah tur a thlen an ni. Children’s Home atangin naupang 30 te chu an nu leh pa emaw an chhungte hnena awm tura chhuahtir niin, 2 te chu Foster Care hnuaiah dah an ni. Naupang Dan anga fa atana lak theih (Adoptable) 2 awmin, 1 hi In-Country adoption a pek niin, 1 zawk hi tunah chhungkaw thar (Adoptive family) a awm turin buatsaih mek a ni.
Lockdown lai hian naupang te’n mobile phone an en atangin thil tha lo tam tak an zir niin a lang a, chuvangin a enkawltu puitling zawkte hian nasa leh zual a kan tu leh fa te kan vil that leh zual a pawimawh tak zet a ni. Hemi bakah hian naupang humhimna kawngah khawtlang hruaitute leh mipuite nen a thawhhona a that avangin hetianga nausen emaw naupang emaw nu leh pa thil sual tih vanga harsatna tawk an hriat chuan report a lo lut vat zel a, a rang thei ang bera hmalak thin a ni.
Juvenile Justice Board, Lunglei bik a case lut zingah hian a tam ber chu mipa niin an case lo lut zingah hian hmeichhia pakhat a tel bawk. Heng case thar lut te atang hian 9 chu IPC dan bawtchhiatna niin, 9 te hi Special and Local Laws dan bawtchhiatna te niin Juvenile Justice (Care and Protection of Children) Act 2015 in Preliminary Assessment lak theih a tih anga lak ngai a awm lo. JJB case bikah hian I.T. Act 2000, Rukruk, POCSO case te Hmeichhe zahawmna tihbawrhbanna lam leh Inchhunga luh ruk case te a hluar hle a ni.