Vawiin 26.11.2024 chawhma dar 11:00 khan Baptist Church Orphanage, Ramzotlang, Serkawn-ah Fahrah Naupang leh chanhaite enkawltu chhungkua chawimawina Ni (Foster Families Appreciation Day) chu District Child Protection Unit, Women & Child Development, Lunglei leh Baptist Child Resources Centre tangkawpa hman a ni. He hunah hian Lunglei district chhunga naupang chanhai enkawltu chhungkua mi 14 te hnenah chawimawi thuziak hlan an ni.
Vawiin programme a hunserh hmangtu Rev.L Vanlalsanga, Director, Social Concern Department, Baptist Church of Mizoram (BCM) chuan mi tam takin kan tih theih loh leh kan rilruah pawh la thawk tlat lo kan nih lai a, vawiina hetiang ang ruahmanna awm hi lawmawm a tih thu te, programme lian tak khawvel thil a mi challang te telna ni lo mah se, Pathian mit hmuhah a ropui hle a ni tiin Pathian hmangaihna kan lantirna pawimawh tak mai hetianga, foster family kan awm hi ka ngaihlu hle che u a, hemi kawnga Pathianin in rilru a tih harh sak che u hi lawmawm ka ti hle a ni, a ti.
Thusawitu dang Pi Lalrinkimi Hmar, DCPO Lunglei pawhin kumtin November thla hi Adoption(Dân hmanga Fa lâk) inzirtirna thla a hman a nih thu te, hemi kawngah pawh tun thla chhung hian department in hmun hrang hrangah Information Booth te siama zirtirna neih anih dan te leh tun dinhmunah Lunglei district chhungah Foster care ah naupang 18 an awm thu te leh Mizoram pumah mi 66 an awm mek thu te a sawi bawk. Vawiin programme-ah hian BCO naupangte atangin zai mawi tak leh Changvawn sawi ngaihthlak anih bakah Naupang enkawltu te chhungkua atangin thusawi ngaihthlak a ni. Vawiin Foster Families Appreciation Day hi Lunglei district –ah vawi khat hmanna a ni.
